L’IEO OPM e le CCOA rejonhon lo CREO Tolosa (Centre Regional de l’Ensenhament de l’Occitan de l’Acadèmia de Tolosa), tan coma Calandreta, Oc-Bi e lo Felibritge, respondent aital a la crida del collectiu “Per que viscan nòstras lengas”, e vos convidan a una manifestacion lo dissabte 29 de mai a-z-Albi.
Lo recampament es previst a 14o30 dins lo Pargue Ròcaguda (davant l’Hotel Rochegude, costat pargue), seguit de presas de paraula de las associacions organizatritz, puèi d’un desfilat en musica acompanhat d’artistas de la region dins las carrièras albigesas.
Mot d’òrdre : SOS ensenhament, sosten a la recenta lei relativa a la proteccion e a la promocion de las lengas regionalas e a son aplicacion.
Lo 21 de mai, lo Conselh Constitucional invalidèt dos articles d’aquela lei – concernissent l’ensenhament immersiu e los signes diacritics – considerats coma “anticonstitucionals”. Aquesta decision es un atac grèu envèrs los e las qu’òbran cada jorn a l’ensenhament, a la promocion e a la defensa de nòstra lenga e nòstra cultura occitanas, a l’escòla e dins los luòcs d’usatge. Aquela accion es doncas essenciala per portar nòstre sosten a la lei Molac e per mostrar nòstra determinacion per son aplicacion en integralitat. Aquela accion es doncas essenciala per portar nòstre sosten a la lei Molac e per mostrar nòstra determinacion per son aplicacion en integralitat.
Alara, portatz vòstras bandièras, aprestatz vòstras pancartas e vòstres melhors eslogans e vestissètz vòstra masqueta la mai polida !
Comptam sus vòstra preséncia lo 29 de mai, per mostrar vòstra sosten, e vòstra estacament a nòstra polida lenga occitana !
Mobilizem-nos per que visca nòstra lenga !
La còla de l’IEO OPM vos a aprestat 2 visuals. Sètz liures de los far virar, de los utilizar al vòstre agrat del temps de la manifestacion… !
