Çò que sèm

Un Malhum al Servici de la Lenga Occitana

Lo Contèxte

La Lenga es un vector fondamental de la cultura umana. S’agís d’un patrimòni immaterial.

Lo Conselh d’Euròpa, l’Union Europèa o encara l’UNESCO valorizan la diversitat lingüistica per fin de preservar las diferentas culturas que fan l’Umanitat.

En França, malgrat una politica lingüistica istoricament monolingüa francofòna, la revision constitucionala del 23 de julhet de 2008 permet a la Constitucion d’afirmar dins l’article 75-1 que : “Las lengas regionalas apartenon al patrimòni de França.”

Avalorar aquel patrimòni es una necessitat sociala e economica : la lenga es portaira de valors d’una societat aital coma un factor de desvolopament que permet los escambis.

L’occitan al meteis títol que las autras lengas fa part d’aquel patrimòni. Òr, la lenga occitane es uèi minorizada e apaubrida sul sieu territòri istoric, fauta d’èsser sostenguda per la poténcia publica. Es doncas essencial que d’organizacions poscan prene lo relais per sa desfensa e sa promocion, per fin de li assegurar un avenidor.

L’Institut d’Estudis Occitans (IEO) es una d’aquestas principalas organizacions.

L’IEO e las siás missions

L’IEO es una associacion lei 1901 reconeguda d’utilitat publica (1949) e agradada Joventut e educacion populara (1986).

Èsser membre de l’IEO, es consacrar son temps, son saber e son trabalh per rendre al quotidian a la lenga occitana la plaça qu’es deguda a un idiòme bèl d’Euròpa. Es per aquò que l’IEO es en primièra linha per demandar una plaça per l’occitan dins la vida publica, los mèdias e l’ensenhament. L’IEO òbra a la socializacion de la lenga (desvolopament del sieu usatge coma aisina de comunicacion) en promovent son usatge e en produsissent los otisses indispensables a-n-aquela socializacion.

L’IEO s’es donat per mission de produire la documentacion necessària a la vida de la lenga e de permetre a cadun de legir e d’aprene l’occitan. Jòga lo ròtle institucional de normalizacion e de modernizacion lingüistica, portat en d’autres endacòm mai per la poténcia publica. Amb aquò produsís de riquesa, inestimabla.

L’IEO OPM

L’Institut d’Estudis Occitans de la Region Occitània / Pirenèus-Mediterranèa es una associacion (lei de 1901) que fa partida de la federacion IEO que n’es l’escalon regional. Aquela federacion a principalament per tòca lo manten, la promocion e lo desvolopament de la lenga e de la cultura occitanas.

L’IEO OPM anima una ret, compausada de 9 seccions departamentalas de l’Institut d’Estudis Occitans, de 20 cèrcles locals e de maitas associacions aderentas.

Ten primièr una mission de representacion de totas aquelas estructuras, representacion que mena al prèp de las collectivitats publicas, una mission d’animacion del malhum pel biais de jornadas de regropament, d’una ajuda personalizada a la sestructuras ; bòta tanben en plaça una comunicacion globala sul territòri regional per l’ensemble del malhum (site internet, guida…).

Sos mejans d’accion de cap al public bèl son :

  • L’ensenhament, notadament jos forma de corses publics per adultes
  • Las activitats educativas pels joves ;
  • Las activitats e manifestacions culturalas (conferéncias, cafès occitans, velhadas, recitals, publicacions, organizacion d’espectacles, de mòstras, de concèrts, eca), pròprias a favorizar la coneissença de la lenga e de la cultura occitanas e son usatge public ;
  • Tota autra iniciativa que pòt pemetre de complir los objectius de l’associacion.

Vida Associativa

L’IEO OPM es una associacion que sos estatuts respectan escrupulosament aqueles de l’Institut d’Estudis Occitans. Se ne volètz saber mai sul nòstre foncionament e nòstra democracia intèrna vos convidam a los consultar.

L’associacion es obèrta a totes, sus adesion, e i sètz lo·la benvengut·da tanlèu que vos interessatz a la salvagarda e a la promocion de la lenga e de la cultura occitanas. Pour aderir, res de pus simple : descargatz lo bulletin aquí contra, e tornatz-nos lo, per corrièr o per mail. Notatz que perpausam una adesion pels parelhs tanplan coma per las autras associacions.

Lo Diari

Lo Diari es una publicacion de l’IEO OPM. Es un magazine doblat d’un magazine en linha a 100% en occitan, que tracta de la cultura e de l’actualitat culturala e qu’investís de domenis variats coma la musica, la literatura, lo cinèma, las arts visualas, los viatges, las tecnologias novèlas, los videojòcs… Lo Diari recampa bravament de collaborators venguts de tot l’espaci occitan (Auvèrnha, Gasconha, Lengadòc, Lemosin, Provença…) a l’entorn d’un projècte unic e de qualitat. Un agenda participatiu en linha permet de visualizar d’una ulhada las activitats e eveniments pròches d’en cò sieu.

Lo Diari es disponible sus abonament papier (25 € per an, siá 6 numèros de 36 paginas color), a la venda al numèro dins d’unes punts de distribucion, o sus abonament (annadièr o mensual) per la siá version 100% numerica.

Pin It on Pinterest

Share This