La Region Occitània/Pirenèus-Mediterranèa ven de lançar un plan de mobilizacion a l’entorn de las lengas occitana e catalana, nommat “Cultura Viva”. Presentat coma una fuèlha de rota regionala, aquel plan vòl afirmar una volontat de desvolopament, de valorizacion e d’afortiment de las politicas lingüisticas existentas, en lançant d’iniciativas nòvas.
La primièra etapa d’aqueste plan es una granda concertacion d’escalon regional, amb una fasa d’enquèsta en linha al prèp de totes los ciutadans mas tanben dels actors concernits, que sián culturals, politics o economics, aital coma de talhièrs territorials, declinats dins cadun dels 13 departaments. La tòca es de reculhir de proposicions novèlas en favor de las nòstras lengas e de lor desvolopament.
La seccion regionala de l’Institut d’Estudis Occitans saluda aquela iniciativa e desira convidar largament a participar a las fasas de concertacion. Sometètz vòstras idèas e proposicions !
Senhalam que doas enquèstas son obèrtas, aquò duscas al 13 de junh de 2022 : una al prèp del public bèl e una mai especificament adreçada als joves de 15 a 18 ans. Los talhièrs de concertacion se debanaràn eles de mai a julhet, puèi s’enseguirà una votason ciutadana.