N’aviam parlat dins una actualitat passada : lo 29 de mai se debanavan dins maitas vilas pertot en França d’acamps en defensa de las lengas regionalas, aprèp l’ataca sens precedent del Conselh Constitucional, qu’invalida d’unes articles de la lei Molac, sola lei dempuèi mai de 50 ans a far un minimum avançar las causas sus l’ensenhament de nòstras lengas. L’ensenhament immersiu notadament, public o privat, es remés en question en seguida de la decision del Conselh Constitucional, es doncas al costat de la FELCO coma de las Calandretas qu’associatius e emplegats de l’IEO regional (fòto) an manifestat a-z-Albi, aprèp una presa de paraula del sieu president, Miquèl Taiac, de representants de las principalas estructuras occitanas e d’elegits. Aqueste meteis jorn, l’IEO Regional èra tanben present a Somèiras (Gard).
Coma d’autras associacions localas talas coma lo Centre Cultural Occitan d’Albigés, avèm en aquesta ocasion afirmat l’idèa que tota ataca menada contra l’ensenhament de l’occitan tocava tanben largament tot lo malhum associatiu cultural e remet en causa la plaça de l’occitan dins una societat que, pasmens, contribuiguèt de fargar.
A-z-Albi son gaireben 500 personas que se lancèron per las carrièras del centre, duscas a la prefectura ont foguèt remesa una tièra de noms demandant ara, entre autras causas, una modificacion consequenta de l’article 2 de la Constitucion, qu’empacha en l’estat tota avançada concrèta per nòstras lengas.