Cobèrta Lo Diari n°69 "Molière e lo teatre popular"

Una galariá virtuala per l’art occitan

L’Institut d’Estudis Occitans region Occitània/Pirenèus-Mediterranèa a lo plaser de vos convidar a la jornada de lançament de La Galariá, galariá virtuala d’art occitan

lo 16 d’octobre de 2022 a 16h
a l’aperitiu d’obertura

seguit d’una taula redonda, de performanças artisticas e del concèrt d’Arnaud Cance al Chorus, 144 avenguda de Murèth a Tolosa.

Eric FRAJ
President

La Galariá ?

La Galariá es un projècte novèl, nascut dins las paginas del magazine cultural en occitan Lo Diari, editat per l’IEO region Occitània. L’artista Joan-Carles Codèrc, qu’i ten dempuèi 2020 la rubrica d’expression artistica liura, la PEL (Praxis Escrita Liura), volguèt qu’anguèssem mai luènh dins la reflexion e dins l’accion, en prepausant un espaci virtual d’exposicion per d’artistas e d’òbras que fan servir l’occitan, qu’aquò siá coma supòrt, matèria, mejan…

Aquesta galariá aprofecharà d’una inauguracion plan fisica ela. Aquela d’aquí se farà lo dimenge 16 d’octobre al Chorus, a Tolosa, dins l’encastre del Festenal Occitània organizat el per l’IEO 31.

Programa detalhat

15h – Alandada de las pòrtas.

16h – Discors d’inauguracion per Eric Fraj, president de l’IEO OPM.

16h15 – Presentacion de Lo Diari e de La Galariá, aperitiu ofèrt.

16h30 – Taula redonda “I a un art occitan ?” amb d’artistas, de pensaires e d’actors culturals.

La question de l’articulacion entre una lenga minoritària e la creacion artistica es pas nòva en se, es per exemple ja presenta en çò de Fèlix Marcèl Castanh a comptar de las annadas 50. Larga, tròba d’assages de responsa pas que dins lo far, l’exemple, la mòstra… e la reflexion dins aquò ? Plan d’artistas an desvolopat al fial del temps d’apròchis de lenga occitana per la creacion plastica, que l’illustren, la figuren, la representen, l’utilizen, la suggeriscan… o la calen, perfèit miralh de realitats complèxas. Mas una lenga pòt vertadièrament èsser estacada a un univèrs visual ? Pòt arribar a existir fòra d’ela-meteissa ? Es sonque una lenga-cultura o tanben un espaci geografic e mental ? Cossí e quora l’immaterial rescontra la matèria ? L’art pòt solament èsser occitan ? Perqué e cossí se causís d’obrar dins o amb aquesta lenga ? Aquesta taula redonda recamparà de creator·as, mas tanben d’especialistas e d’apassionat·das, que faràn entreveire lor trabalh e debatràn amassa d’aquelas problematicas. Intervenent·as e public poiràn puèi s’interrogar collectivament sus la plaça daissada uèi a la creacion d’expression occitana dins los mitans artistics, e sul sieu avenidor.

Convidat·das (jos resèrva de participacion) : Luc Aussibal, Bernat Cauhapè, Robin Chouleur, Joan-Carles Codèrc, Isabelle François, Cyril Gispert, Léo Humbert, Candice Jaussent, Serge Labatut, Gérard Marty, Didier Mir, Serge Pey, Jaumes Privat, Laurent Redoulès, Jordan Saïsset…

Animacion/moderacion : Danís Chapduèlh, cap-redactor del Diari.

19h – Concèrt d’Arnaud Cance.

E tota la vesprada :

– Escotas liuras e projeccions.
– Performanças artisticas.
– Realizacion d’una òbra originala collectiva.
– Mòstra e venda d’òbras.
– Estanquet e pichòta restauracion.
– Banc del Diari.

Gratuit

Le Chorus
144 Avenguda de Murèth
Rue de la Digue
31300 Tolosa

galaria@lodiari.com
09 62 56 09 91