“La Mòrt, rites e representacions”

Lo Diari, magazine cultural editat per l’IEO OPM, s’espaventa amb un numèro d’autona sus la mòrt !

De fait non, la paur es pauc presenta, que l’idèa aquí èra de tractar aquel tèma sensible que non sai amb un pauc de distància, una nautor antropologica e tanben bravament de benvolença.

Un viatge al Mexic, pels camps de cempasúchils del Día de Muertos, una entrevista “deathstyle” amb la tanatològa Juliette Cazes, la descobèrta de “Cafès Mortals” dins Òlt, un retrach-enquèsta etnologic sus “Tanta Chiqueta”, una tanta qu’a decidentament l’art de desbarcar sens èsser convidada, puèi de cronicas arts, literatura, sciéncias, cinèma, serias, jòcs vidèo, fotografia, que s’estacan a parlar de las representacions coma dels rites ligats a la mòrt…

Aquí de qué adometgir un bricon la Camarda !

Aqueste numèro vos interèssa ? Vos rapelam que lo mai important dels sotens, lo mai segur per garantir las nòstras seguretat e continuitat, nòstra independéncia editoriala e nòstra qualitat es lo vòstre. E o podètz manifestar mercés a un gèste simplàs : l’abonament al magazine. Los diferents numèros del Diari son tanben disponibles a la crompa a l’unitat.

Bona lectura !