L’Institut d’Estudis Occitans fa paréisser una guida de las associacions que compausan sa ret en region Occitània/Pirenèus-Mediteranèa.
La tòca d’aquesta guida-annuari es de listar las associacions qu’òbran per l’occitan dins la region Occitània, que fagan part de la federacion IEO o que ne sián sòcias. Per cada associacion principala, las activitats e servicis prepausats son mencionats, aital coma los oraris d’obertura dels centres de ressorsas e totes los contactes que cal.
Vist l’importància qu’aquò ten d’aquesta passa, una part bèla de las informacions tòca a l’aprendissatge de l’occitan, amb una tièra dels corses e talhièrs tanplan coma una mapa.
Aquesta guida es distribuida a gràtis, e se pòt tre ara legir en linha. Nos podètz tanben contactar per ne recebre e aital difusar al vòstre entorn !
Edito
L’Institut d’Estudis Occitans (IEO), associacion lei 1901 creada en 1945, promòu la lenga e la cultura occitanas. Reconegut d’utilitat publica (1949), reconegut Joventut e Educacion populara (1986), l’IEO es una federacion de gaireben 110 associacions, dont 9 seccions departamentalas, 19 cercles locals, 77 associacions aderentas.
Causa d’aquò, es present dins la quasi totalitat del territòri de la Region Occitania/Pirenèus-Mediterranèa. Cada associacion es un nos de la ret IEO : un lòc d’usatge e d’aprendissatge de la lenga-cultura d’òc, un crusòl d’iniciativas e de creacions de tota mena (corses, talhièrs, festivals, concèrts, bals, representacions teatralas, conferéncias, sortidas…).
Caduna d’elas, per la varietat e la qualitat de sas activitats, fa de l’IEO un dels actors màgers de la perennizacion e del renovèl de l’occitan. Per l’estudi e lo far se desplegan, al còr de la societat actuala, d’espacis novèls qu’exprimisson a l’encòp l’especificitat e l’universalitat d’una lenga-cultura que, dels trobadors a las òbras mai contemporanèas, concernisson lo monde d’aicí e l’umanitat tota.
Aicesta guida es doncas mai qu’un panorama complèt de las associacions de l’IEO e de lors activitats. Respond a de questions basicas (Ont aprendre l’occitan ? Ont lo practicar ? Ont assistir a d’eveniments culturals ? Qui contactar pas trop luènh de l’ostal ? Cossí s’informar ? Etc.) mas es plan mai qu’aquò : vertadièra invitacion a la compartida en descobèrta d’una alteritat, invitacion a l’invencion comuna d’una pluralitat ciutadana novèla, d’un orizont cultural novèl, la ret IEO s’adreça pas a un public privat e captiu, mas al contra es obèrta a totas las personas e entitats, a totas las iniciativas – extèrnas e intèrnas – de collaboracions, de mutualizacions, de creacions collectivas.
Nòstra guida es la vòstra, un dels instruments que, aicí e ara, reconcílian çò local amb çò global.
Bona lectura !
Eric Fraj
President de l’Institut d’Estudis Occitans
de la Region Occitania/Pirenèus-Mediterranèa