Abans la pandemia, l’IEO OPM aviá pres la decisions d’èsser en capacitat de perpausar, a destinacion dels associatius del sieu malhum, una a doas amassadas, de tempses de formacion o d’autoformacion a l’entorn de subjèctes en ligam amb l’activitat associativa occitana. Mas aprèp una sesilha dedicada als corses e talhièrs d’occitan per adultes en febrièr de 2020, catastròfa, un primièr embarrament ! E tot çò que seguís e ven fatalament contrariar la mobilitat a l’escala regionala e la tenguda de rencontres “en presencial” segon lo neologisme ja consacrat.

Rai d’aquò, aquesta crisi aurà tanben fait ressorgir de besonhs e a modificat, sens dobte de biais duradís, d’unas practicas. L’IEO OPM a doncas obrat, pendent aquesta annada e qualques, a la mesa en plaça d’un bèl malhum de sites, miralh internetic perfièit de la siá organizacion entre associacions. Se bastís totjorn, pauc a pauc, site aprèp site, e los veiretz espelir pro regularament.

Mas demorava d’apréner a se’n saber servir ! Una sesilha de formacion al redaccional e a WordPress (l’aisina qu’utilizam per bastir aquestes sites) es doncas estada organizada dins nòstre burèu de l’Ostal d’Occitània a Tolosa, una primièra experimentacion en òbras practicas al prèp d’associaitus de l’IEO d’Arièja, del CCOR e de l’IEO Erau.

La tòca d’aqueste tipe de formacions e d’arribar a botar en forma d’articles d’actualitat, a los publicar, a los indexar e a los classificar coma cal, a la gròssa e a la lèsta d’aumentar la visibilitat de las accions associativas e de la lenga occitana sul web. Çò que, a l’ora d’ara, es plan vital…

D’autras sesilhas de formacion seràn organizadas en 2022, totjorn en pichons gropes. D’unas mesuras demòran de mòda !

Pin It on Pinterest

Share This