Del temps de l’Amassada Generala de l’IEO OPM organizada lo 25 de març de 2023, organizarem un temps d’escambi obèrt a tot lo monde, aderent-a-s o pas a l’Institut d’Estudis Occitans.
“Cossí socializar mai la lenga ?”
14h30-17h
Lo concèpte de “resocializacion” existís dempuèi bèl brieu dins las reflexions occitanistas, coma demest totes los aparaires d’una lenga minorizada. Aquò nais del constat, compartit, de l’abséncia de mai en mai vesedoira d’una lenga dins d’espacis que deuriá pasmens, en tant que lenga istorica del territòri carrejant una vision del monde rica e diferenta, poblar. Aital la lenga occitana desapareis, pauc a pauc, de la societat que contribuiguèt pasmens a bastir. Quina plaça uèi per la diversitat lingüistica e culturala del territòri francés ? Ont es la volontat de las institucions per una politica lingüistica ambiciosa e comuna ? Quinas iniciativas podèm menar per capitar de trapar, d’aicí e d’alai, d’espacis segurs (reals o, perqué pas, virtuals) de discutida, de compartida, de practica e d’existéncia, per que la lenga occitana posca enfin quitar de subreviure per tot simplament viure ? Quines mejans, ancians o novèls, podèm far servir per transmetre sa saba e son sens, a de comunautats umanas, e cossí provocar lor interès a la causa ?
Aquel escambi, animat per la còla de l’IEO OPM, se vòl obèrt a totes e totas, coma un temps de mesa en comun d’experiéncias e de reflexions sus un subjècte que nos pertòca. Una primièra pèira sus la longa via de la resocializacion !