Dins la mira de sosténer lo malhum e las associacions mai particularament, l’IEO OPM ensaja d’anar encontrar lo mond associatiu dins son parçan. Es l’escasença de discutir e veire cossí podèm melhor ajudar cadun.

Lo 14 de genièr passat, Eric Fraj e Cathy Lacroix – lo president e la directritz – anèron participar a l’AG de l’IEO del Vilafrancat.

Al mes de mai de 2022, l’IEO del Vilafrancat recebèt las claus d’un Ostal de l’occitan situat a Vilafranca de Roèrgue (carrièra Pomairòl). Es mai precisament l’ostal de las associacions occitanas : l’IEO lo compartís ambe l’Adòc12 e l’Institut Occitan d’Avairon. Aquel ostal es un don d’una abitanta, la dòna Sire, qu’èra justament presenta a l’AG. Permet ara a l’IEO d’aver una sala de corses (a l’estatge), una cosina (a l’estatge tanben) e una sala a planpè amb una veirina virada sus la carrièra. L’Adòc12 e l’IOA benefician de burèus e de salas per l’archivatge.

Per l’inauguracion organizèron una brava fèsta que los daisset ailàs un pauc sus la palha.

L’IEO del Vilafrancat es una associacion activa que sos objectius son de crear un ligam entre los unes e los autres mercé a l’occitan, e tanben far viure la lenga dins la vida vidanta. E, per aquò far, totas las oportunitats son bonas de prendre : cosina, cant, corses, pichòta edicion, Nadalets, animacions dins las escòlas, concèrts, etc… Lo rapòrt d’activitats èra long coma lo braç e vertadièrament impressionant ! Òsca !

Èran presents un adjunt comunal e un conselhièr departamental que, en francés e un pauc en occitan, tornèron assegurar l’associacion de tot lor sosten.
L’IEO OPM prepausèt son ajuda administrativa e comptabla, e son president diguèt tot lo ben que pensava del vam, de la pertinéncia de las causidas faitas e del biais de las menar.

Los diferents rapòrts e estats financièrs foguèron validats a l’unanimitat e l’amassada s’acabèt ambe rires e discutidas a l’entorn d’un gòt e de còcas dels reis.

Mercejam totas las personas benevòlas per lor engatjament per la lenga e tanben per lor acuèlh calorós.

AG de l'IEO del Vilafrancat
AG de l'IEO del Vilafrancat
AG de l'IEO del Vilafrancat