“Especial licean·a·s”

Lo Diari, magazine cultural editat per l’IEO OPM, fa paréisser en aquel mes d’octobre un numèro especial, lo sieu primièr fòra seria.

S’agís d’una demanda de l’Ofici public de la lenga occitana, que ven de lançar un ambiciós Plan d’Accion Licèus per l’annada 2021-2022, per tal d’enfaciar la baissa d’efectius en occitan dins lo segondari.

Aquel objectiu rejunh d’envejas e projèctes ja formulats per l’IEO OPM e l’equipa del Diari, de poder s’adreçar mai dirèctament als joves e de trabalhar a l’entorn d’autras formulas del nòstre magazine.

Nos butèt a tornar pensar en pregondor nòstres contenguts e nòstra maqueta : per aquò un suènh particular es estat aportat al dinamisme grafic, a l’accessibilitat del contengut e a las tematicas desvolopadas, que totas correspondon als interèsses culturals dels liceans e liceanas. En soma, parlam de cultura populara de uèi… mas o fasèm a 100% en occitan.

L’OPLO nous acordèt una fisança totala per çò qu’es del contengut redaccional, e los mercejam. De son costat, obrèt a la difusion d’aquel Diari especial, al prèp dels liceans escolarizats en occitan de las doas regions cobèrtas per la siá accion, de saber Occitània/Pirenèus-Mediterranèa e Novèla Aquitània. Parlam doncas d’un volume de difusion sens precedent per Lo Diari.

Cal notar que coma es estat integralament assumit per la comanda publica, aquel numèro d’aquí es gratuit. Es doncas dempuèi pauc perpausat a la lectura sens tirar un sòu de la pòcha a partir del site lodiari.com e podètz tan coma volètz o telecargar al format PDF, estampar, montrar, difusar…

Mas oblidetz pas : s’aqueste numèro vos agrada, lo melhor mejan de sosténer la publicacion es encara de vos abonar !

Bona lectura !