Çò qu’aviá desaparegut pòt, de còps, renàisser. E qual reviscòl ! L’Armanac cetòri èra estat un monument de la literatura populara (e felibrenca) de la vila maritima, que la Primièra Guèrra mondiala escanèt en 1914. Mai de cent ans aprèp, es mai viu, e lo vaquí que tòrna, a las colors de 2022, engimbrat per lo Ceucle occitan setòri e maquetat per l’artista Rodín Kaufmann.
Cal pas tròp comptar i crosar los Sants, nimai i trobar lo calendièr de las fèstas, mas un essencial plan fornit i es, amb la volontat de daissar la plaça a la paraula e a la cultura vivas, en francés, en occitan o dins un francitan dels mai saboroses. Es Seta en son entièr que s’i retròba : la cosina, las ajustas, la pesca, Brassens, la lenga, las arts, los cosins venguts d’Itàlia… E aquò dins una varietat de formats : cançons, poèmas, analisis, recèptas, entrevistas, cronicas que fugisson pas la vena umoristica tanpauc. Totes los e las que sabon escriure o parlar sus la riba de Taur i son estats convidats, e se’n son pas virats !
Collectiu
Ceucle occitan setòri – 11/2021
162 paginas – 12 x 21 cm – 15€
ISBN 978-2-9580522-0-1
De comandar al prèp del Ceucle occitan setòri.