Dempuèi 3 ans, l’IEO OPM trabalha sus un projècte d’agenda global, participatiu, obèrt, amb per objectiu de prepausar una aisina evenimenciala de referéncia per tot çò que tòca a la cultura occitana. Aquela aisina es estada desvolopada en estrèita collaboracion amb l’arquitectura d’OpenAgenda e l’entrepresa del meteis nom, principalament per nòstre projècte de magazine cultural Lo Diari, mas a poscut se sonque amb l’implicacion d’autres actors partenarials que son l’Ofici public de la lenga occitana, Lo CIRDÒC-Institut occitan de cultura e lo Congrès permanent de la lenga occitana.
Aital, totes se metèron d’acòrd per far existir aquela superagenda, qu’a per especificitat d’agregar automaticament los eveniments d’autras agendas de talha mai modèsta, que s’agisca d’artistas, d’associacions, de viraires, de collectivitats… Totes seràn d’ara enlà amassats, s’an un ligam amb l’ocitan, jos la bandièra del CalenDiari, que se lança doncas oficialament en junh de 2025. Lo CalenDiari farà ganhar a totes los actors un temps preciós e multiplicarà los efièits de la comunicacion evenimenciala !
Se sètz « consomator-a » d’eveniments occitans, alara per vos lo projècte prendrà la fòrma d’un site sul qual poiretz coma volètz anar a la pesca a las informacions : los eveniments i son geolocalizadas, tipologizats, datats… e n’i a ja fòrça !
S’organizatz d’eveniments, alara poiretz anar sus l’interfàcia d’OpenAgenda per crear vòstre compte e vòstra agenda (es gratuit dins la limita de 365 eveniments per an) o plan simplament alimentar las agendas existentas obèrtas a contribucion.
Coma aquesta aisina a mestièr d’un pauc de presa en man o de cambiar d’unas abituds, fòrça guidas per començar, documents de presentacion del projècte, visuals, tutorials, son disponibles sus nòstre site dedicat o aquel d’OpenAgenda. Per tot lo demai trantalhetz pas de nos contactar !