L’Institut d’Estudis Occitans d’Erau ven de lançar son novèl site internet, realizat per l’IEO Region Occitania.

E… rau ! prepausa un blòg d’actualitats dels cèrcles occitans del departament, d’eveniments occitans e qualques galejadas, mas tanben una botiga en linha, que E… rau ! edicions tòrna préner lo ròtle d’editor occitan a la seguida de l’IEO Lengadòc. Romans, poesias, contes, vos i espèran ! L’IEO OPM interven tanben sus las maquetas dels darrièrs obratges, e las doas estructuras trabalhan la man dins la man per tal de dinamizar l’occitan e la creacion culturala occitana dins lo país d’Erau.

Mas E… rau ! es tanben una letra d’informacions, demest las mai complètas del monde occitan. Prepausa revista de premsa, actualitats, bilhets, edito e contengut umoristic, e vos i podètz marcar dirèctament sul site.

Enfin, l’IEO Erau recampa un brave nombre de cèrcles asociatius locals, cadun amb sa pagina, son espaci, son fial de blòg, de donadas de contacte ; de mai, una carta interactiva los amassa totes. Una sola adreça per saber ont seguir de corses, ont anar al balèti o rescontrar d’autres occitans dins Erau !

Aqueste site e las foncionalitats volgudas per la còla de l’IEO Erau s’inscrivon dins un trabalh de long menat per l’IEO OPM, un anar d’ajuda a la creacion o a la refonta dels sites internet de las associacions del malhum per una melhora visibilitat, e la mesa en comun (e en ret !) dels espleits tecnologics. D’autres seguiràn !