Aprèp mantuna sason capitada, l’Institut d’Estudis Occitans de la Region Occitania/Pirenèus-Mediterranèa, en partenariat amb la DRAC Occitania, tòrna lançar en 2023 sos encontres literaris.
Aquela operacion a per tòca de valorizar l’escrit de lenga d’òc, per d’eveniments a l’entorn de la literatura, ont los autors e autoras d’òbras en occitan (o bilingüas) que publiquèron recentament poiràn anar al rencontre de legeires e legeiras, dins tota la Region Occitana se vòlon.
Cossí ne vira ?
– L’IEO OPM prepausa a las associacions de sa ret un programa d’intervencions per la fin de l’annada 2023 (de setembre a decembre), sus la basa d’un catalògue d’autors e d’autoras establit per avança.
– L’actualitat (sortidas recentas) es privilegiat, dins totes los domenis de la literatura e de l’escrit en general : roman, poesia, mas tanben traduccion, arts, o cosina.
– L’intervencion es organizada per l’associacion mas financièrament presa en carga per l’IEO OPM, amb lo sosten de la DRAC, sus la basa de remborsaments de fraisses de desplaçament o de prestacions de servici.
– Los intervenent-a-s poiràn èsser menats a se desplaçar sus tot lo territòri regional, segon los encontres programats.
Qualques chifras
En 2022, 59 intervencions foguèron organizadas, amb 21 autors e autoras. Al total gaireben 1600 personas i assistiguèron.
Vos agradariá d’i participar ?
Al 03/07, las inscripcions son ara tampadas! Se çaquelà desiratz poder organizar a gràtis una intervencion, contactatz-nos amb lo formulari çai-jos.
Esperam vos veire aquela davalada del temps d’un dels nòstres rencontres literaris !