Avètz ja pensat a aculhir un o una jove volontari/volontària en servici civic dins vòstra estructura ?

L’IEO OPM vos permet d’o far !

De qu’es lo servici civic ?

Pels joves, lo servici civic es un engatjament al servici de l’interès general. Es plan sovent un primièr pas cap al monde del trabalh. Una mission de servici civic es una experiéncia de ciutadanetat, de descobèrta e d’obertura sul monde. Existís una mission per cadun, al servici de totes !

Per vòstra estructura, lo servici civic es l’escasença, pendent 8 meses, d’experimentar, d’innovar, de transmetre, e de tocar de publics novèls.

Mercés a la persona qu’aculhiretz, mai de publics poiràn aprofieitar d’accions de proximitat, d’iniciativas e de perspectivas novèlas sus la lenga e la cultura occitanas.

Cossí fonciona ?

L’Institut d’Estudis Occitans de la region Occitània / Pirenèus-Mediterranèa dispausa d’un agradament de servici civic.

Aquò vòl dire que podèm aculhir de volontaris, mas dins nòstre cas ne podèm metre a disposicion d’autras estructuras sòcias. Aquò se sona l’intermediacion.

Asseguram tot lo portatge administratiu (contractes, indemnitat), redigissèm e publicam las ofèrtas de mission, recebèm las candidaturas e podèm tanben vos ajudar a far passar d’entretens.

Pel jove asseguram lo tutorat e l’ajudam a fargar lo sieu projècte d’avenidor.

Aquò vos interessa ?

Vos sufís de nos contactar, per mail o telefòne, puèi parlarem de çò que se pòt metre en plaça per aculhir al melhor un o una jove dins la vòstra estructura.

Pin It on Pinterest

Share This