Le 3 de genièr passat, nos daissèt Danièl Malacan, president de Rebel d’Òc, le cercle occitan de Revel e son parçan. Danièl èra nascut en 1955 dins la campanha de Tarn, dins una família pacana que totas las generacions s’i costejavan. Tre l’enfança, banha dins la lenga occitana, que la parlan les parents, les grands e les oncles. Les parents, meitadièrs, debon daissar la bòrda quand es represa pels proprietaris. La família migra doncas dins un vilatge vesin e se confronta al mond obrièr. Danièl sièc le meteis camin ; après d’estudis a-s-Aush, se fa emplegat dins le domeni agricòla puèi mai tard comercial, totjorn dins le maquinisme agricòla, e causa d’aquò percor las rotas d’Occitania.
Fòrça actiu tre sa joventut dins le mond associatiu, es gràcias a un encontre, pendent una representacion al fogal del vilatge ambe Padena, plan conegut dins los paratges, qu’a “una revelacion” o puslèu la presa de consciéncia que sas rasics son aquí. A causa d’aquò, cèssa pas de defendre, ambe’l bèc e las urpas, la lenga originala. Bèl primièr decidís de préner de corses a l’IEO per se perfeccionar e poder transmetre son saber.
En 2014 crèa l’associacion Rebel d’Òc. Dintre d’aquesta, de corses e talhièrs de lenga son balhats en collaboracion ambe son amiga Geneviève, qu’aviá seguit la meteissa formacion qu’el. Divèrsas manifestacions festivas, culturalas e convivialas i son prepausadas ambe l’intervencion de gropes occitans per far conéisser nòstra cultura.
Aquelas dètz darrièras annadas, l’occitan èra vengut son combat vertadièr. Manquèt cap de manifestacion importanta a Besièrs , Carcassona, etc., per far ausir sa volontat d’èsser entendut e defendut per que nòstra lenga visca e siá transmesa. Letraferit d’istòria d’Occitania, mancava pas la mendre escasença de la defendre e de se revoltar contra le centralisme parisenc e les libres d’istòria que nos ocultan complètament, notadament per quant al periòde del catarisme.
Le projècte qu’i teniá entre totes, èra de celebrar ongan les 10 ans d’existéncia de l’Associacion per una dimenjada festiva e culturala, ambe de monde coneguts coma Florant Mercadièr, Cristian Almerge, Coriandre, Bombes de Bal, e d’autres, amb exposicions e restauracion. Rebel d’Òc va assajar d’onorar sa volontat en mantenent la programacion d’aquesta fèsta les 9 e 10 d’agost venents.
Ambe Danièl Malacan avèm perdut un òme de conviccions e de cultura, obèrt als autres e al mond, un militant de tria que sapièt convéncer, recampar al sieu entorn e bastir. L’oblidarem pas.
A sa família e a sos pròches, l’IEO-OPM presenta sas condolenças pus atristadas.
Eric Fraj
President de l’IEO region Occitania