Après quasiment 20 ans al servici de l'Institut d'Estudis Occitans, la nòstra directritz, Cathy Lacroix, a decidit de se'n anar per naular cap a d'autres orizonts. Un desir que se compren, tant es vertat que plan de monde – a fauta de passar a l'acte – sòmian al pus pauc de trocar la rotina per la rota. Cathy a gausat e sabut far del desir realitat, e d'aquel coratge podèm pas que la felicitar.
Comencèt a trabalhar per l'IEO dit "federal", en 2007, en contracte ajudat a mièg temps, puèi en CDI, a l'epòca del regretat director Jan Moreu e del president Dàvid Grosclaude. Segur qu'èra plan ensenhada. Puèi trabalhèt ambe Laurenç Gosset fins a 2016 (gaireben 10 ans). En 2016 encadenèt a l'IEO OPM coma encargada de mission jos la direccion de Sebastien Pugin, abans d'èsser causida coma directritz en 2019. Passèt doncas 10 ans a obrar per la nòstra ret, 10 ans que non foguèron pas un long flume tranquille, tant se'n manca !
Cathy sabèt defendre l'activitat de cada associacion e la legitimitat de las subvencions al prèp de la Region Occitanie e de las autras institucions partenàrias, coma sabèt tanben bailejar los projèctes Lo Diari e La Galariá. Pòdi pas precisar aicí totas las ajudas e capitadas d'una directritz totjorn atentiva als membres e als problèmas de las seccions (administracion, comptabilitat, estructuracion, recrutaments, etc.), totjorn capabla de trobar las solucions adeqüatas. En mai, la nòstra directritz de tria conjugava benvolença e sens de l'etica, sense jamai se desfar d'un esperit occitanista militant, totas causas que son pas totjorn de bon trobar. De l'aver del nòstre costat foguèt un astre e un plaser, e al nom de l'IEO OPM la mercegi grandament de tot çò que faguèt sense relambi.
Bona rota novèla, Cathy, e que la vida te siá doça !
Eric Fraj
President de l'IEO OPM