Lo Diari #FS03 (octobre de 2023)
« Robèrt Lafont«
2023 marca lo centenari de Robèrt Lafont, una figura màger de l’occitanisme. Ongan, maitas celebracions se debanan dins l’encastre d’una operacion aviada pel CIRDÒC – Institut occitan de cultura.
L’IEO OPM desirava participar a aqueles omenatges en editant un numèro fòra seria del sieu magazine cultural Lo Diari, entièrament centrat sus Robèrt Lafont e la siá òbra, en s’atorejant de personalitats especialistas de facietas diferentas de l’òme : literatura, teatre, lingüistica, poesia, politica…
Mercés als nòstres partenaris, lo CIRDÒC – Institut occitan de cultura e la Region Occitania/Pirenèus-Mediterranèa, aquel fòra seria de 20 paginas s’es poscut distribuir a gràtis dins tota la region e al delà.
Lo numèro es d’alhors, e gratuitament tanplan, disponible a la lectura e al telecargament sul site meteis del Diari e es tanben possible de lo comandar !
Lo dissabte 30 de setembre de 2023 presentèrem aquel Diari, dins l’encastre del festenal Occitania. S’enseguiguèt una taula redonda amb Joan Ives Casanova, Clara Torrelhas, Alan Alcouffe e Patric Sauzet, animada pel nòstre president Eric Fraj, qu’interpretèt puèi de poèmas de Robèrt Lafont acompanhat de Morgan Astruc a la guitarra. Un eveniment plan polit, fait possible per la Bibliotèca d’Estudis e del Patrimòni (BEP) de Tolosa !