Aqueste diluns 23 de genièr, la còla salariada de l’IEO region Occitania e lo sieu president avián convengut d’anar vistalhar La Ciutat, tèrç-lòc dedicat a la lenga e a la cultura occitana dreit espelit dins lo barri del Hedars, a Pau. I sèm estats amistosament aculhits pel president de l’associacion gestionària e de salariat-da-s per una passejada pel complèxe, d’un ample e d’una ambicion sens parièr. Burèus, centres de documentacion, de creacion, espacis de convivialitat… tot concòrda per far de l’ensemble un caplòc de sociabilizacion, d’expression e de cultura occitana en Bearn. Foguèrem impressionat-da-s pel potencial del site e de totas aquestas estructuras ramosadas a l’entorn de valors e d’objectius comuns. Una sinergia qu’a de qué noirir nòstras reflexions per çò qu’es de l’espelida de tals lòcs un pauc pertot sul territòri ; permetrián de visibilizar la lenga occitana e de desvolopar mai eficaçament de projèctes culturals.
Ne profitèrem per parlar de nòstres projèctes pròpis, per pausar las basas de futurs escambis e collaboracions e per saludar qualques estructuras amigas amb las qualas trabalham e escambiam a l’escasença (Lo Congrès, Lo CIRDÒC-Institut Occitan de Cultura…)
Haut La Ciutat !
