I pensàvem dempuèi bèl brieu, es d’ara enlà una realitat : l’IEO OPM acaba d’editar un document (fòrça) grand public per far descobrir la lenga e la cultura occitanas.
Aqueste document de primièr accès, que balha qualques elements de coneissença essencials e l’enveja d’anar mai luènh, lo trobàvem de manca, e èrem pas sols ! Decidiguèrem doncas d’aprofieitar de nòstras competéncias graficas per editar un desplegant d’una forma originala, qu’interpèla e que desirarem gardar.
Succession d’imatges engana-l’uènh, jòga sus çò que cresèm saber de l’occitan sens o saber a de bon, sus çò que supausam e çò que devinam, sus aquel iceberg que vesèm jamai en totalitat… Los tèxtes son eles plan simples e plan dirèctes, per far passar un maximum d’informacions utilas en pauques mots, primièr sus la lenga, puèi sus la creacion culturala, avant de listar qualques sites de referéncia. Enfin, una carta sintetica permet de visualizar l’airal geografic sul qual se parla(va) occitan. Pas mai !
Sèm a espandir d’exemplars papièr d’aqueste desplegant de se conhar dins la pòcha, al près de nòstres partenaris, institucions o associacions del malhum, o dels oficis de torisme de l’espaci occitan. Un còdi QR remanda a una version en linha del supòrt, que prepausa mai de contengut, mai interactiu. Nos podèm pas téner de vos convidar a i anar tre ara espepissar la causa !