|
|
|
|
|
|
Al mes de març espelisson un fum de causas : eveniments, parucions... Tant talament que podèm pas tot listar aicí, vos caldrà anar butinejar endacòm mai, a l'azard dins Lo Diari.
|
|
Ailàs, la fin de febrièr foguèt ela un crebacòr, amb la disparicion de figuras del nòstre moviment que lor fasèm omenatge.
|
|
Una letra ni carn ni peis, atal se menan las nòstras existéncias !
|
|
|
|
|
|
|
📣 Qué de nòu a l'IEO OPM ❔
|
|
|
|
AG 2026
Se sètz aderent-a e a jorn de vòstre escotisson, auretz l'informacion d'autra part, çaquelà aicí es, coma remembron o assaber totjorn utile e planvengut : l'amassada generala de la nòstra associacion se farà lo dissabte 28 de març a Carcassona.
|
|
Lo programa de la jornada es en linha, tanplan coma un formulari per s'inscriure e se marcar pel repais de miègjorn. Tot es important dins çò que venèm de dire !
|
|
|
|
|
|
|
|
Lo Diari "pintoresc"
|
Es tot caud sortit de las rotativas e quitament pas encara arribat ençò dels abonat-das, es lo n°90 de nòstre magazine cultural.
|
|
Cobrirà març e abril, aquò's la tempsada ; e la pintura, aquò's la tematica.
|
|
Un numèro fòrça colorat, qu'esbòça de retraches d'artistas, d'uèi o d'un còp èra e questiona la lutz coma "escòla" picturala miegjornala.
|
|
Vos fa lega ? Nos podèm adobar 👇
|
|
|
|
|
|
|
|
Se far seguir Lo Diari pertot
|
Puèi que parlam del Diari, aquí una novetat ideala per començar de nasejar defòra : un tote bag, coma se ditz en francés. De merchandising (coma se ditz en francés tanben) que pren la forma d'un sac de coton qu'assegurarà sosten a vòstra esquina e a vòstre mèdia en mai de vos garantir una classa internacionala en occitan. 7€, de comandar ara !
|
|
|
|
|
|
|
|
📰 Las actualitats del malhum regional 🌐
|
|
|
IEO Òlt (46)
|
L'annada es plan començada mas ne demòra ! E aquesta annada es la que la seccion oltesa de l'Institut d'estudis occitans festeja los sieus 50 ans.
|
|
D'aquí una operacion bèla a l'escala del departament, nommada "Òc en Òlt" : un programa ric d'eveniments de tota mena, escampilhats sus tot lo territòri carcinòl e tota l'annada.
|
|
Aquò se fa naturalament amb un fum de partenaris locals, associacions, comunas, lòcs, que s'engatjan per la promocion de l'occitan dins lo parçan.
|
|
|
|
|
|
|
|
IEO Erau (34)
|
L’eveniment de la prima dins Erau es la sortida del libre Larzac… Larzac… de Georges Nespoulous.
|
|
Aqueste roman entre ficcion e realitat vos emplonsa dins 2 epòcas istoricas brutalas e lo famós camp del Larzac : en 50-60 quand i embarravan los militants del FLN e dins las annadas 70 quand lo volián espandir.
|
|
L'estrena del libre es prevista l'11 a Juvinhac mas ja lo podètz comandar en linha sus la botiga d'E...rau! edicions.
|
|
|
|
|
|
|
|
IEO Avairon (12)
|
La prima tòrna (enfin esperam, al punt que ne sèm sabèm pas jamai), vòl dire que la Prima occitana tanben !
|
|
Aquesta manifestacion organizada per la seccion avaironesa de l'IEO prepausa, sus un parelh de setmanas, un manat d'eveniments variats : animacions, teatre, conferéncias, rescontres, projeccion, lo tot amb una atencion particulara portada al public jove. E coma d'acostuma : demandatz lo programa ! (Es dejós 👇)
|
|
|
|
|
|
|
|
💡 Per far conéisser vòstras accions (eveniments, parucions...) al demai de la ret IEO e al demai del monde, mandatz-nos de causas a danis@ieo-opm.com, e vos apondrem a la letra d'informacions lo còp que ven.
|
|
|
|
|
|
🌍 En defòra del malhum (mas pas tròp luènh)... 🪐
|
|
|
Defuntada de Bernat Cauhapè
La darrièra setmana de febrièr foguèt marcada per de disparicions de mai d'una figura del moviment occitan, que nos daissan còrdolent-as.
|
|
Dins la region apreniam atal que l'artista Bernat Cauhapè, amb qual aviam collaborat, nos daissava. Eric Fraj li a escrit un omenatge que se pòt legir sul nòstre site.
|
|
|
|
|
|
|
|
E de Joan-Claudi Maurette
|
Totjorn en çò nòstre, mai del costat sud de Tolosa, es lo Jean-Claude Maurette qu'es defuntat, lo meteis jorn.
|
Lo musician d'Autariba, escaissat "l'Esquiròl", faguèt dançar de generacions de monde, sovent amb son complici Claudi Roméro, dins lo duo Lo Jaç, emblematic del reviscòl de las musicas tradicionalas occitanas.
|
|
Aquí es Annia Wolf que nos ne ditz qualques mots, personals.
|
|
|
|
|
|
|
|
Femnas d'Òc
|
Lo mes de març es un moment ara costumièr per parlar dels dreits de las femnas. E justament lo CIRDÒC estrena a Carcassona (mediatèca Grain d'sel) una mòstra "l'occitan al femenin" que n'avètz aquí la polida aficha. De figuras victimas d'una invisibilizacion dobla (la de la lenga e la del genre) i son mesas en lum, de las trobairises duscas a las artistas d'uèi.
|
|
Nos disèm que benlèu aquela exposicion se poirà far virar, coma sovent amb las del CIRDÒC ? 👀
|
|
|
|
|
|
|
|
|
|
