|
|
|
|
|
|
Tornarem pas aicí sus la nòstra amassada generala de Carcassona (que se passèt fòrt plan, se vos pausàvetz la question), que lo compte rendut n'es estat mandat d'autra part a las personas aderentas a l'associacion. Non, aquí anam parlar de quicòm mai e gaireben pas que de causas a venir !
|
|
|
|
|
|
|
📣 Qué de nòu a l'IEO OPM ❔
|
|
|
|
L'occitan... version web
|
Vos parlèrem ja aquí del nòstre document de comunicacion grand public L'occitan c'est pas ce que vous croyez. E ben es sortit e la distribucion es endralhada ! Dins lo meteis temps n'avèm fargat lo pendent numeric, interactiu, de bon consultar sus un telefonet. Gaitatz-o e digatz-nos çò que ne pensatz, que contràriament a çò estampat i podèm portar d'adobaments !
|
|
|
|
|
|
|
|
Contraconte
|
O sabètz qu'amb Lo Diari fasèm de podcasts ? Aqueste vos pòt interessar : dins Contraconte, Renaud Labadiá Savy abòrda un tròç mesconegut de l'istòria occitana amb saviesa e un pecic d'umor. Dins "Lo darrièr reialme de Narbona", s'ataca a l'èra visigotica, quand Narbona èra capitala... duscas al moment qu'o foguèt pas pus !
|
|
|
|
|
|
|
|
Formacion VHSS
|
L'an passat prenguèrem la decision de far formar tota la còla a la luta contra las VHSS (violences et harcèlement sexiste et sexuel). Es ara fait e avèm una persona referenta en intèrne sus aquel subjècte fondamental, Elodia Saulnier. Vòl dire que podèm ajudar totas las personas del malhum a avançar sus la question. Per aquò far, trantalhetz pas d'escriure a Elodia : com@ieo-opm.com.
|
|
|
|
|
|
📰 Las actualitats del malhum regional 🌐
|
|
|
La Tuta d'Òc / IEO 31
|
Lo 15 d'abril a l'Ostal d'Occitania de Tolosa, la librariá La Tuta d'Òc de l'IEO 31 organiza un encontre literari a l'entorn de las edicions Tròba Vox e del recuèlh per paréisser Fraternitat Mediterranèa 45 poètas. Seràn present-as Élisabeth Aragon, Franc Bardou, Eric Fraj, Francis Pornon, Bruno Ruiz, Christian Saint Paul, Modesta Suarez, Alem Surre-Garcia, Gerard Zuchetto... L'encontre serà seguit pel recital Clamor de Sandra Hurtado-Ròs e Claire Masson.
|
|
|
|
|
|
|
|
Cercle occitan dau Clapàs (34)
|
Lo 15 d'abril tanben, de l'autre caire de la region bèla, a Montpelhièr, lo cercle occitan de la vila organiza son "Cafè occitan" a la Gazeta Cafè, amb un programa plan dense : la presentacion del libre Dins las carrièras dau Clapàs per Pascal Wagner, de cants, de danças tradicionalas e enfin un balèti amb lo trio Tira Camin. E tot aquò a gratis !
|
|
|
|
|
|
|
|
IEO Òlt (46)
|
A l'escasença dels sieus 50 ans, l'IEO d'Òlt s'es associat al Departament, al Parc natural regional - Geoparc mondial UNESCO dels Causses de Carcin e al Grand Fijac per organizar d'assisas per l'occitan, lo dissabte 25 d'abril, a Fijac. A l'entorn del tèma "Explorer de nouvelles formes de coopération", se farà un estat dels lòcs de l'accion culturala occitana dins lo departament e un retorn d'experiéncias amb Jan Màri Caunet de l'IEO Lemosin. Puèi cinèma amb la projeccion de La Seria e enfin concèrt omenatge a Alberte Forestier e bal.
|
|
|
|
|
|
|
|
|
💡 Per far conéisser vòstras accions (eveniments, parucions...) al demai de la ret IEO e al demai del monde, mandatz-nos de causas a danis@ieo-opm.com, e vos apondrem a la letra d'informacions lo còp que ven.
|
|
|
|
|
|
🌍 En defòra del malhum (mas pas tròp luènh)... 🪐
|
|
|
Escòla de Gramat (46)
|
La carta escolara 2026 prevei la supression d'un pòste d'ensenhaire a l'escòla Clément Brouqui de Gramat, (Òlt). La seccion bilingüa es dirèctament menaçada, puèi risca crear de marridas condicions d'ensenhament. L'associacion dels parents a lançat una peticion per demandar lo manten de l'existent.
|
|
|
|
|
|
|
|
La Passem!
|
L'edicion 2026 de La Passem, la corsa de relai per l'occitan, se sarra ! Seràn 2000 quilomètres de córrer entre Bedós e Anglet mas amb de bestorns per Òlt e Garona e duscas a Sent Gaudenç e Sent Guironç. La corsa a ara son imne oficial per 2026, e d'oraris de passatge, mas sembla que i aja encara de quilomètres de crompar se volètz sosténer l'iniciativa.
|
|
|
|
|
|
|
|
Encontres del CREO
|
D'encontres academics del CREO de Tolosa se debanaràn a Najac los 4, 5 e 6 de mai venents amb d’escolans venguts de tota l’academia. Aqueste eveniment a per objectiu de recampar los escolans bilingües a l'entorn d’activitats pedagogicas, artisticas e culturalas. Per ne saber mai : creotoulouse@gmail.com
|
|
|
|
|
|
|
|
