|
|
|
|
|
|
Aquí totas caudas una padelada d'actualitats en, sus e a l'entorn de l'occitan dins la ret de l'Institut d'estudis occitans de la region Occitània e al delà. De qué vos ne tapar un trauc abans la fornada seguenta !
|
|
|
|
|
|
|
📣 Qué de nòu a l'IEO OPM ❔
|
|
|
Corses per adultes
|
Lo 20 d'octòbre passat, faguèrem un 1èr acamp dedicat als corses d'occitan per adultes dins la region. Bon, la fòto aquí foguèt presa al dinnar, mas avèm tanben plan trabalhat !
|
|
Se desgatgèron 4 axes de reflexion : comunicacion, estructuracion, mutualizacion e formacion. Èra pas que la dobertura d'òbras mai bèlas, que se perseguiràn en pichons gropes, abans un autre encontre en febrièr...
|
|
Nos podètz dire s'aquò vos interèssa d'i participar !
|
|
|
|
|
|
Comunicacion visuala
|
Sabètz que prepausam de servicis grafics pel monde del malhum IEO (e mai) ? Aquò va de l'aficha al maquetatge de libres, en passant pels desplegants, lògos, pegasolets...
|
|
Aquò's lo trabalh d'Elodia, que coneissètz segurament per çò que fa amb Lo Diari, nòstre magazine cultural, mas tanben amb de libres en occitan, per l'IEO d'Erau, l'IEO d'Aude...
|
|
E ben ne podètz profitar tanben, a de tarifas avantatjosas sul mercat, sufís de nos o demandar !
|
|
|
|
|
|
Servicis civics
|
Tant que sèm a nos far de reclama, ne vos vaquí una autra : sabiatz que podiam aculhir de personas en mission de servici civic ?
|
|
E mai qu'aquò : podèm far çò que s'apèla d'intermediacion, es a dire metre a disposicion una persona volontària per una autra associacion que ela a pas l'agradament que cal mas a una mission de prepausar.
|
|
Fasèm tot çò cag... administratiu sens que còste tròp a l'estructura, e tot lo monde es content !
|
|
Contactatz-nos per ne saber mai.
|
|
|
|
|
|
📰 Las actualitats del malhum regional 🌐
|
|
|
Los Barjacaires (46)
|
Los Barjacaires vos convidan a lor serada mesadièra lo dissabte 15 de novembre tre 17h a l'Ostal de Rampós (46). A-n-aquela escasença, la tropa de l'IEO 12, Un teatre sens nom, jogarà la pèça Diablògues, 6 scenetas de Roland Dubillard adaptadas en occitan e sustitoladas en francés.
|
E aprèp lo repais, Los Barjacaires animaràn un balèti !
|
|
|
|
|
|
|
|
Cercle de Pàmias (09)
|
Lo Festenal Occitan tòrna a Pàmias los 21 e 22 de novembre ! Al programa, de teatre amb Les Galejaires, de talhièrs, la presentacion del libre Las cronicas de la pansiroja per Joan Eygun, seguit d'un repais (garbura) e del concèrt amb Trio BÈC.
|
|
Totjorn dins l’encastre del Festenal occitan, lo Cercle Occitan Prosper Estieu vos prepausa una serada Contes dels Pirenèus amb Joan-Pau Ferré lo 13/11 e l'espectacle « N’i a pro! » de Marie Coumes & Laurent Cavalié lo 29/11.
|
|
|
|
|
|
CCOA (81)
|
Lo dissabte 29 de novembre a 17h se tendrà la conferéncia Joan Bodon, lo STO a Breslau de Cécile Noilhan al Centre Occitan Ròcaguda a Albi (81). Pendent lo mes de novembre, lo Centre Cultural Occitan d'Albigés fa omenatge a Bodon amb de conferéncias e la mòstra Joan Bodon, escrivan, visibla del 15/11 fins al 13/12.
|
|
|
|
|
|
|
|
|
💡 Per far conéisser vòstras accions (eveniments, parucions...) al demai de la ret IEO e al demai del monde, mandatz-nos de causas a danis@ieo-opm.com, e vos apondrem a la letra d'informacions lo còp que ven.
|
|
|
|
|
|
🌍 En defòra del malhum (mas pas tròp luènh)... 🪐
|
|
|
Senat
|
En seguida d'un trabalh senatorial que ne parlàvem i a qualques tempses, la comission de la cultura de la cambra nauta a rendut son rapòrt e prepausa ara una lista de mesuras que dison "ambiciosas" en favor de l'ensenhament. Fan tanben un bilanç d'etapa de la lei Molac e se i a d'avançadas, los progrèsses son mai que mesurats. Vos conselham la lectura d'aquel article de Dis-leur! que fa un pauc lo torn de la question.
|
|
|
|
|
|
|
|
Agregacion
|
Se lo concors de l'agregacion serà plan obèrt per l'occitan en 2026, avèm aprés que seriá pas organizat pel creòl, çò qu'esmalís bravament lo monde de Martinica e de Guadalope. De tant que la responsa del rectorat es de parlar de "regulacion". Tant coma per la caça (es de sason) ?
|
|
|
|
|
|
|
|
Accents
|
I a qualques jorns, mas représ per un fum de mèdias, se publicava un estudi que ditz que "une majorité de français ressentent une disparition des accents régionaux".
|
|
Se ne parlèt fòrça d'aquel estudi, comanditat per una plataforma d'aprendissatge de las lengas que ne profitava atal per se far de reclama, mas de sociolingüistas cridèron de far atencion a l'entitolat, que se parla de "sentit", pas de faits scientificament mesurats. Mèfi doncas a las interpretacions !
|
|
|
|
|
Qué que ne siá, aquò a permetut, en marge, de tornar parlar de las lengas minoritàrias e de lor apòrt al francés.
|
|
|
|
|
|
|
|
