|
|
|
|
|
Primièra letra de l'an ! Ja per començar vos desiram una bona annada, plan granada e plan acompanhada. Per un visual d'illustracion d'aquel vòt, rendèz-vos en casa 1 de nòstre calendièr de l'Après, es a dire dirèctament dejós.
|
|
E anatz veire dins aquela letra : nosautres avèm pas que de bonas novèlas ! Insistissèm plan sus "nosautres".
|
|
|
|
|
|
|
📣 Qué de nòu a l'IEO OPM ❔
|
|
|
|
Bona annada !
Tot es dins lo títol, e mai dins l'imatge a costat (clicatz per lo veire en bèla talha). L'avèm manlevat a nòstre Diari per vos desirar a totas e totes una annada plan granada, e aquò dins un fum de lengas d'Euròpa.
|
Las fòtos amb lo Danielon son eissidas d'un viatge que faguèt nòstra grafista Elodia Saulnier en 2023-2024. Un viatge educatiu doncas !
|
|
|
|
|
|
Lo diari
|
Per lo numèro de genièr de nòstre magazine, anam çaquelà mens luènh que Finlàndia : davalada en gara de Pau !
|
|
Per las carrièras de la vila i serà question d'istòria, de reis de França, de Navarra o de Suècia, mas tanben d'arquitectura, de lenga occitana, de vida culturala locala, d'escambis e quitament de formatge.
|
|
Ça-vietz descobrir aqueth numèro especiau !
|
|
|
|
|
|
|
|
La Galariá
|
L'òbra grafica que vesètz aquí se ditz Fin'amor e foguèt faita per Pèir Lavit. Amb 4 autras que totas illustran de sentits umans e de mots d'òc, venon de dintrar en aqueste mes de genièr dins La Galariá, l'espaci de creacion artistica del Diari.
|
|
Aqueles trabalhs grafics se pòdon remirar, segur, mas se vertadièrament vos agradan fòrça, ne podètz crompar per afichar dins vòstre ostal !
|
|
|
|
|
|
|
|
📰 Las actualitats del malhum regional 🌐
|
|
|
Dictada occitana (COPC)
|
A la fin del mes, tòrna la famosa Dictada occitana. Pas res a veire amb la de Pivot, sonque lo plaser de s'apracticar a l'escrit en occitan. Per la màger part, las dictadas se faràn sus tot lo territòri occitan lo 31 de genièr, amb qualques excepcions. Avètz la lista de las vilas e de las datas sus l'aficha. Coma cada an, es lo Centre occitan del País Castrés qu'organiza la coordenacion de l'eveniment, e aquò duscas al País Valencian.
|
|
|
|
|
|
Zo mai! (48)
|
Ven d'espelir l'associacion Zo mai en Losera, una associacion occitana que desirèt còpsec far partida del malhum IEO. Zo mai prepausarà de corses de lenga e de cant a comptar d'aquesta annada novèla, mas deuriá tanben èsser en mesura d'organizar d'eveniments sul territòri loseriòt, coma un Total Festum. Òsca bèla !
|
|
|
|
|
|
AMTPQ (46)
|
L'associacion per las musicas de tradicion populara en Carcin, fa son amassada generala los 24 e 25 de genièr a Deganhac dins Òlt. Pel monde d'en defòra de l'associacion serà mai que mai l'escasença de venir i festejar los 40 ans d'una associacion de terren creada en 1985, amb un concèrt de "Camins de biais" presentat per Xavier Vidal, una mòstra, un bal amb iniciacion, un repais, un espectacle e un gòt de l'amistat.
|
|
|
|
|
|
|
|
💡 Per far conéisser vòstras accions (eveniments, parucions...) al demai de la ret IEO e al demai del monde, mandatz-nos de causas a danis@ieo-opm.com, e vos apondrem a la letra d'informacions lo còp que ven.
|
|
|
|
|
|
🌍 En defòra del malhum (mas pas tròp luènh)... 🪐
|
|
|
Nuèits de la lectura
|
L'operacion ministeriala de las "Nuèits de la lectura" tòrna del 21 al 25 de genièr de 2026. Sa tematica n'es "Vilas e campanhas". Per l'occitan, podètz ja notar dos eveniments del CIRDÒC : un club de lectura animat pels estudiants de l'Universitat Paul Valéry a Besièrs e una serada pijama pels pichons e mens pichons a Pau.
|
|
E tanben un brave eveniment a l'Ostal del Telh d'Orlhac, tot a l'entorn de Marcela Delpastre : lecturas, mòstra, projeccion, jòcs e vespralh. Es lo dissabte 24/01, de 15h a 18h. Benlèu que lo solelh se colca mai d'ora dins Cantal ? 🤔
|
|
|
|
|
|
Kalaallit Nunaat
|
L'actualitat es totjorn l'escasença d'apréner quicòm de novèl sus una tematica que nos tòca. Prenètz Groenlàndia que s'i pòrta de lum d'aquesta passa. Aquel territòri artic estacat a Danemarc dispausa d'una autonomia larga e a una sola lenga oficiala. Pas lo danés, non, mas lo groenlandés, o kalaallisut, sa lenga autoctòna, que fa partida de la familha de las lengas inuit-alèutas. Seriá parlat per "sonque" 50 000 personas, çò que representa gaireben tota la populacion del país, bèl 4 còps coma França. Qué que ne siá, los Groenlandeses comprenon e parlan plan l'anglés american atanben !
|
|
|
|
|
|
|
|
|
