|
|
|
|
|
Daissam pas gaire filar los jorns de febrièr abans de vos mandar una letra (fresca) d'informacions (aitanplan frescas).
|
|
Lo mes es cortet mas se passan bravament de causas !
|
|
|
|
|
|
|
📣 Qué de nòu a l'IEO OPM ❔
|
|
|
Document de comunicacion
|
|
Sèm a metre la darrièra man a un pichòt afar original : un document de primièr accès a l'occitan, qu'explica en qualques mots çò qu'es e indica de ressorsas. Trobàvem de manca aquela mena de causa, çò que podèm parar al monde quand nos demandan "L'occitan ? Kézako* ?" o, piéger, qu'an lo cap claufit d'idèas recebudas. Espandirem largament aquel supòrt "engana-luèlh", que serà benlèu passat dins d'autras lengas. Digatz-nos se ne volètz !
|
|
* en francés dins lo tèxte
|
|
|
|
|
|
Encontre corses per adultes
|
N'aviam parlat dins una letra precedenta : avèm aviat una obrassa de las bèlas a l'entorn dels corses e talhièrs d'occitan per adultes dispensats per las associacions del malhum IEO en region Occitania. Aprèp un primièr temps lo 20 d'octòbre a Tolosa, nos tornam trobar lo 23 de febrièr al CIRDÒC de Besièrs. Esperam poder avançar sus de causas concrètas en matèria de comunicacion, d'estructuracion, de tarificacion, de formacion... S'aquò vos interèssa, nos podètz demandar a recebre d'informacions especificas.
|
|
|
|
|
|
OpenAgenda / Lo CalenDiari
|
Sètz de mai en mai nombroses e nombrosas a vos servir de l'OpenAgenda Lo CalenDiari qu'avèm lançat en 2025. Mas es possible de ne far encara mai per que venga l'aisina evenimenciala occitana de referéncia. Per aquò rampelam que cada estructura se pòt dotar d'una agenda, es gratuit e pro simple, es çò que conselham de far. Autrament es totjorn possible de dintrar una data dins la superagenda Lo CalenDiari, dobèrta a contribucion. Vesètz !
|
|
|
|
|
|
|
|
📰 Las actualitats del malhum regional 🌐
|
|
|
Le Lecteur du Val (31)
"Dins la bóstia de las letras, un papieròt : rendètz-vos a l’estacion de metrò de Ramonvila."
|
Aquò's l'incipit de contunhar, en occitan o en francés, per participar al concors de novèlas del Lecteur du Val, l'associacion de bibliotècas de Lauragués. 28ena edicion çaquelà per aquel concors plan presat !
|
|
Avètz duscas al 19 de febrièr per participar s'es pas encara fait !
|
|
|
|
|
|
|
|
IEO Arièja (09)
|
Dins Arièja multiplican las activitats ont l'occitan es lo mòde de comunicacion de quicòm mai : activitats fisicas, artisticas... Son de talhièrs que permeton de se desvolopar mas d'o far dins la lenga nòstra, d'un biais natural.
|
|
Lo rendètz-vos que ven l'onze de febrièr es un talhièr d'aigarèla, a Pàmias, amb Robert Fernandez.
|
|
|
|
|
|
|
|
CCOR (12)
|
Lo Centre cultural occitan de Roergue vos convida al restaurant !
|
|
Per manjar, òc, mas vos convidan mai que mai a venir legir (o escotar) un tèxte, en occitan o en francés.
|
|
Aquò se passarà lo divendres 20 de febrièr a Rodés, mas se cal marcar abans lo 13.
|
|
Un encontre per se noirir parièrament l'anma e lo còs !
|
|
|
|
|
|
|
|
💡 Per far conéisser vòstras accions (eveniments, parucions...) al demai de la ret IEO e al demai del monde, mandatz-nos de causas a danis@ieo-opm.com, e vos apondrem a la letra d'informacions lo còp que ven.
|
|
|
|
|
|
🌍 En defòra del malhum (mas pas tròp luènh)... 🪐
|
|
|
Maria Roanet
Fa una setmana desapareissiá Maria Roanet, figura importanta de l'occitanisme, de la literatura occitana e francesa, o encara de la "nòva cançon occitana".
|
|
S'o avètz pas ja vist passar, vos convidam a legir l'article d'omenatge qu'Eric Fraj li consacra sul nòstre site :
|
|
|
|
|
|
|
|
Festenal Nòu
|
Es la segonda edicion d'aqueste festenal, que causís un posicionament dels interessants : lo teatre, òc, mas pel public jove ! Organizat per l'associacion Cròca Luna e La Rampe-TIO se debana a Santa Africa (Avairon) del 3 al 7 de febrièr. Es benlèu mai segurament començat al moment que legiretz aquestas linhas, pasmens vos conselham çaquelà de gaitar la programacion e de seguir l'eveniment dins lo futur.
|
|
|
|
|
|
|
|
Florilangues
|
S'èra montat un collectiu per l'ensenhament de las literaturas en lengas regionalas a l'escòla que defendiá çò que son nom indica plan. Aquí fan paréisser un plaidejament material per lor objècte : un florilègi de 35 tèxtes dins 16 domenis lingüistics diferents, que mòstran una literatura viva e ancorada. De notar un prefaci de Barbara Cassin... membra de l'Academia francesa, que ne sabiam pertant lo desinterès (per lo mens) per las lengas minoritàrias. Un senhal encoratjaire ?
|
|
|
|
|
|
|
|
|
|
