|
|
|
|
|
|
Va plan ? Avètz sortit lo quasernet e l'estilo ? Perque aquí anam encadenar las datas de reténer. E encara, es pas qu'una seleccion ! Se per cas vos agrada mai legir qu'escriure, vos senhalam tanben de sortidas d'obratges e revistas.
|
|
|
|
|
|
|
📣 Qué de nòu a l'IEO OPM ❔
|
|
|
|
Un burèu novèl a l'IEO OPM
|
Se compausa d'Eric Fraj, president, d'Annia Wolf, clavaira, e Joan-Miquèl Destacamp, secretari.
|
|
Eric Fraj a escrit un pichòt tèxte per marcar son retorn a la presidéncia, que vos convidam a legir.
|
|
|
|
|
|
|
|
Una guida novèla del malhum
|
Acabam de recampar las informacions pertocant las associacions que fan part del malhum de l'IEO en region Occitània : contactes, activitats... D'alhors s'aquò vòs concernís e qu'avètz pas indicat cap cambiament, es pas tròp tard per o far !
|
|
Aquò nos servís a l'elaboracion d'una guida globala que permet a cada associacion de se presentar al monde e mostrar çò que fa, çò que prepausa, sos ligams amb las estructuras sòcias... Es totjorn utile d'aver aquò dins la pòcha. Sortida dins gaire !
|
|
|
|
|
|
Lo Diari
|
La cobèrta del numèro 91 del Diari es pas qu'en partida colorada. Pas qu'aguèssem mancat de temps, es volgut ! Cal un pecic d'interactivitat per abordar un tèma ont las colors, la maqueta e l'imaginari son justament al còr de l'anament : la literatura per la joventut. Nòstra idèa èra de cobrir tota la cadena, amb autrises, editrises, illustratoras e mai regents e regentas. Coma cada numèro del magazine, lo de mai-junh se pòt legir en linha, mas cal èsser abonat-da... Messatge implicit : abonatz-vos !
|
|
|
|
|
|
|
|
La Galariá s'expausa
|
La Galariá es l'espaci d'expression artistica virtual del Diari. Virtual ? Non, pas aqueste còp, que se va airejar un bricon. Vos balham rendètz-vos lo 6 de junh per l'estrena d'una mòstra en duo : Marie Vignau vèrsus Florenç Pòns. Dos artistas de La Galariá, de dos endreits diferents, doas trajectòrias artisticas que per l'escasença se rejonheràn. Aquò se passa a Tolosa, a l'Ostal d'Occitania, duscas a la debuta de julhet !
|
|
|
|
|
|
|
|
📰 Las actualitats del malhum regional 🌐
|
|
|
La Tuta d'Òc (31)
|
La revista l'ABC del Saber fa paréisser son 4en numèro annadièr, que pòrta aqueste còp sus la(s) sciéncia(s). Per l'escasença, una part del comitat redaccional se recampa sul convit de la Tuta per presentar lo magazine e tanben charrar de perqué es important de parlar de sciéncias en occitan. Eric Fraj, Pascal Thomas, Fernand Vedel o Jaume Jaussaud vos assabentaràn doncas, lo 13 de mai a l'Ostal d'Occitania (Tolosa) !
|
|
|
|
|
|
|
|
En camin per la lenga (82)
|
D'acòrdi, en Gasconha an La Passem! e es flame que non sai. E se l'eveniment finta cada an mai cap a l'èst, cal pas doblidar qu'una autra corsa-relai per la lenga n'es a sa 3ena edicion dins Tarn e Garona. En camin per la lenga, portat entre autres per l'ALCÒC, l'IEO 82 o Òc-Bi, e integrat al dispositiu Total Festum, se debanarà lo 23 de mai entre Dunas e Negrapelissa. Enfin seriá puslèu al monde qu'i van córrer de debanar... de quilomètres !
|
|
|
|
|
|
|
|
CCOA (81)
|
Amb los braves jorns, es totjorn planvengut de se far una pichòta passejada. A Albi, lo Centre cultural occitan vos prepausa un percors instructiu, complètament en occitan, a la descobèrta de las carrièras de la vila e de son istòria. Lo rendètz-vos, que fa partida dels RDV culturals departamentals "Percórrer, la cultura camina dins Tarn", es balhat lo 23 de mai. Mas atencion qu'es limitat en nombre e que se cal marcar abans !
|
|
|
|
|
|
|
|
|
💡 Per far conéisser vòstras accions (eveniments, parucions...) al demai de la ret IEO e al demai del monde, mandatz-nos de causas a danis@ieo-opm.com, e vos apondrem a la letra d'informacions lo còp que ven.
|
|
|
|
|
|
🌍 En defòra del malhum (mas pas tròp luènh)... 🪐
|
|
|
Mémoires de l'occitanisme
|
Un milierat de paginas, gaireben 100 contribucions, es clar qu'avèm afar aquí a un obratge de referéncia, un còp d'uèlh en rèir sul moviment occitan de la segonda mitat del sègle XX. Capitadas e fracasses i son acarats, dins lo contèxte d'una recuolada de la practica sociala de la lenga.
|
|
L'obratge, dirigit per Crestian Lagarda, serà publicat dins lo mes en çò de Trabucaire a Perpinhan, e podètz encara profieitar de la tarifa en soscripcion duscas al 15 de mai !
|
|
|
|
|
|
|
|
Caminaires #3
|
Caminaires es un programa de formacion professionala dedicat a las musicas modalas qu'articula interpretacion, creacion e estructuracion, amb un ancoratge dins los repertòris occitans. La session venenta se debanarà de setembre a junh e Sirventés, que se'n ocupa, an fait una crida a candidaturas. Musician-as professional-as o confirmat-das, avètz duscas al 21 de mai per i respondre !
|
|
|
|
|
|
|
|
La diversitat per subreviure
Aligar la defensa de la biodiversitat e aquela de la diversitat lingüistica, es lo postulat d'aquel ensag escrit per Dàvid Grosclaude.
|
|
Gausant lo parallèl entre rescalfament climatic e refregiment cultural, l'autor i liura d'experiéncias e de reflexions personalas, acompanhadas d'exemples actuals, per illustrar sa volontat d'una luta globala contra la globalizacion e sos efèits.
|
|
|
|
|
|
|
|
|
|
|
